අද අප දිවි ගෙවන්නේ අපූර්ව යුගයක ය. බොහෝ ශ්‍රී ලාංකිකයන්ගේ සිත් සමෘද්ධිමත් ශ්‍රී ලංකාවක් ගැන් වූ සුභ සිහින රැසකින් පිරී ගොස් ඇත. ශ්‍රී ලංකාව බලවත් සංවර්ධිත රාජ්‍යයක් බවට පත්වීම හුදෙක් කාලය පිළිබඳ ප්‍රශ්ණයක් පමනක් යැයි සිතන අයද වෙති. හෙටක් ගැන බලාපොරොත්තුවක් නොමැතිව සිටි සමාජයක් දීප්තිමත් අනාගතයක් ගැන බලපොරොත්තු දල්වාගෙන සිටීම එක අතකින් විශ්මයජනකය. යුධ විජයග්‍රහණයත් සමග අතිවූ මේ තත්ත්වය රටේ අස්සක් මුල්ලක් නෑරම පැතිර පවතින බව පෙනේ.
රටක මහ ජනතාව මෙලෙස රටේ අනාගතය පිළිබඳ දැඩි උනන්දුවෙන් සහ ධනාත්මක හැඟීමකින් කටයුතු කිරීම රජයකට කළාතුරකින් ලැබෙන වාසියකි. නමුත් ඉන් නියම ඵල ප්‍රයෝජන ලබා ගැනීමට රජය අපොහොසත්වුවහොත් මේ උනන්දුව ටික දිනකින්ම වියැකීගොස් නැවතත් පරණ පුරුදු ලංකාවම බවට යළි පරිවර්ථනය වනු ඇත.
පසුගිය සුනාමි විපතින් පසු කාළය තුලද සියළු දෙනා එකට එක්ව මහන්සිවී වැඩකොට රට නගාසිටුවිය යුතුය යන අදහස සමාජය තුළින්ම ඉදිරියට පැමිනියේය. නමුත් ඉන් ප්‍රයෝජනයක් ගත හැකි ආණ්ඩුවක් හෝ ආණ්ඩුව එතැනට තල්ලු කලහැකි විපක්ෂයක් අපට නොවීය.
යුද්ධය විෂයයෙහි නම් වත්මන් රජය දක්වා ඇති දස්කම් අවිවාදිතය. සුදුස්සන් සොයගෙන ඔවුන්ට සුදුසු තැන් ලැබාදීමත්, ඔවුන්ට බධාවලින් තොරව සිය වැඩපිළිවෙලවල් ක්‍රියාත්මක කිරීමමට පහසුකම් සලසා දීමත්, විවිධ බහිර බලපෑම් වලින් ඔවුන් ආරක්ෂා කරගැනීමත් මෙම විජයග්‍රහණයේ රහස විය. මුළු කොටි නායකත්වයම සමූළඝාතනය කිරීමෙන් නොනැවතී රටින් පැන ගොස් දිවි බේරාගෙන සිටි එකම මුල් පෙළේ කොටියාත් මැලේසියවටම්ම ගොස් කුදලාගෙන පැමිණීමට හැකිවීමෙන්ම එහි සාර්ථකත්වය මොනවට පෙන්නුම් කෙරේ.
මොන ප්‍රශ්ණ තිබුනත් ජනතාව රජය කෙරෙහි දැඩි විශ්වාසයකින් පසුවන බවද, යුද්ධය විජයග්‍රහණය කිරීම වෙනුවෙන් කෘතගුණ සලකන බවද පසුගිය මැතිවරණ ප්‍රථිපල වලින් තහවුරු වේ. එහෙත් යුද්ධයක් නතරවීමෙන් පමණක් රටක් ඉබේටම සංවර්ධනය නොවේ. (යුද්ධයකුත් නැති දියුනුවකුත් නැති රටවල් ඕනෑ තරම් තිබේ.) දැන් උදාවී ඇත්තේ ආර්ථික හා සාමාජීය සංවර්ධනයක් වෙනුවෙන් රජය ඉතා උනන්දුවෙන් කියා කලයුතු කාලයයි. යුද්ධය සම්බන්ධයෙන් ක්‍රියාකල ආකාරයටම කැපවීමෙන් සහ ස්ථිර අදිටනින් ක්‍රියා කරන්නේ නම් මෙම අභියෝගයද ජයගැනීම රජයට එතරම් අමාරු නොවනු ඇත ෴
Subscribe to:
Post Comments (Atom)
No comments:
Post a Comment